Праграма грантавай падтрымкі ArtPower Belarus абвяшчае запуск чарговага конкурснага кола па Трэку 1. Арганізацыйнае развіццё. Падача заявак стартуе 17 сакавіка 2026 года і будзе доўжыцца да 12 мая 2026 года (23:59 па мінскім часе). Вынікі будуць абвешчаны не пазней за 10 ліпеня 2026.
Мэта і прыярытэты трэка
Асноўная мэта Трэка 1 — умацаванне патэнцыялу культурніцкіх арганізацый дзеля развіцця інфраструктуры незалежнай беларускай культуры.
Прыярытэт надаецца праектам, якія:
- развіваюць інфраструктурныя або сэрвісныя культурніцкія арганізацыі (хабы, галерэі, арт-рэзідэнцыі, прадюсарскія цэнтры, медыярэсурсы, адукацыйныя цэнтры, студыі і інш.);
- спрыяюць адукацыі, сеткаванню і міжсектаральнаму супрацоўніцтву;
- падтрымліваюць культурніцкую дзейнасць у Беларусі або ўмацоўваюць сувязі паміж культурнымі дзеячамі і аўдыторыяй у Беларусі і дыяспары;
- маюць выключнае значэнне для развіцця беларускай культуры.
Ключавыя ўмовы для ўдзельнікаў
Падтрымка ў межах трэка можа ўключаць:
- укараненне арганізацыйных змяненняў (працэдуры, унутраныя палітыкі, партнёрствы, бяспека);
- распрацоўку камунікацыйных інструментаў (сайты, сацыяльныя сеткі, публічныя матэрыялы);
- павышэнне кампетэнцый каманды, валанцёраў і ўдзельнікаў;
- стратэгічныя сесіі, ментарскія праграмы і стажыроўкі;
- набыццё абсталявання, арэнду памяшканняў, правядзенне аўдытаў;
- асноўнае інстытуцыйнае падтрыманне дзейнасці арганізацыі.
Пры гэтым у межах Трэка 1 не падтрымліваюцца творчыя праекты (канцэрты, фільмы, выставы), калі яны не звязаныя з развіццём самой арганізацыі і з’яўляюцца часткай праекта.
Падавацца могуць:
- зарэгістраваныя арганізацыі,
- незарэгістраваныя ініцыятывы з фіскальным партнёрам.
Для падачы заяўкі па гэтым трэку заяўнікі павінны запоўніць і далучыць дакумент «Ацэнка і план арганізацыйнага развіцця».
Для дапамогі ў падрыхтоўцы гэтага дакумента праграма прапануе ментарынг. Запытаць ментарскую падтрымку можна па пошце info@artpowergrants.org да 28 красавіка 2026 года. Каманда праекта рэкамендуе дасылаць запыты значна раней, каб мець час на фіналізацыю заяўкі.
Асноўныя прычыны, якія могуць стаць падставай для непраходжання тэхнічнага этапу, уключаюць:
- падачу заяўкі атрымальнікам гранта, які на момант падачы ўжо рэалізуе праект у межах праграмы;
- незапаўненне дакумента “Ацэнка і план арганізацыйнага развіцця”, або не адпаведнасць тэксту заяўкі вынікам ацэнкі;
- напісанне заяўкі на мове акрамя беларускай або англійскай.
Працягласць праектаў можа складаць ад 3 да 12 месяцаў. Пачатак рэалізацыі не раней за 1 верасня 2026 года, а канец не пазней 31 жніўня 2026 года.
Сума грантаў: ад 10 000 да 40 000 еўра, можа быць павялічана да 60 000 еўра ў асобных выпадках (праект рэалізуецца ў партнёрстве; дзейнасць праекта ахоплівае дзве ці болей краін).
Інфасесія па Трэку 1
24 сакавіка а 18:30 па Мінску (16:30 па Варшаве, 17:30 па Вільні) каманда ArtPower Belarus правядзе адкрытую інфармацыйную сесію ў фармаце Zoom вэбінара, дзе каманда раскажа пра мэты трэка, прыярытэты і асаблівасці падачы, а таксама сутнасць ментарскай падтрымкі.
Рэгістрацыя адкрытая да 24 сакавіка а 10:00 па Мінску.
Да сустрэчы змогуць далучыцца толькі зарэгістраваныя ўдзельнікі, якія прайшлі верыфікацыю. Спасылку на далучэнне ўдзельнікі атрымаюць па e-mail. Правярайце папкі «Спам» і «Промаакцыі».
Каманда праграмы таксама рэкамендуе перад падачай заяўкі азнаёміцца з публічнымі карыснымі відэаматэрыяламі па Трэку 1 на нашым сайце.
Кантакты і дадатковая інфармацыя
Падача заявак і дакументацыя: byculture.org/artpower_belarus
Пытанні можна дасылаць на пошту: info@artpowergrants.org
Сачыце за абнаўленням у сацыяльных сетках праграмыі: Instagram | Telegram
ArtPower Belarus — гэта маштабная праграма, якая з 2022 года спрыяе развіццю незалежнай беларускай культуры як унутры краіны, так і за яе межамі. Ініцыятыва рэалізуецца Беларускай Радай культуры ў партнёрстве з Дацкім інстытутам культуры і фінансуецца Еўрапейскім Саюзам.
