Пра праект
Гэты праект накіраваны на захаванне і перадачу беларускай нацыянальнай ідэнтычнасці дзецям, якія апынуліся ў эміграцыі разам з сем’ямі. Асноўная ідэя — падтрымліваць сувязь з Беларуссю не праз асобныя сімвалічныя падзеі, а праз рэгулярную адукацыйную і культурную практыку.
Праект рэалізуецца на базе Беларускай школы ў Варшаве (БШВ) і аб’ядноўвае працу рэпрэсаваных беларускіх настаўнікаў з дзецьмі эмігрантаў у фармаце штотыднёвых заняткаў.
Кантэкст і выклік
Пасля 2020 года многія беларускія педагогі былі вымушаныя пакінуць краіну з-за рэпрэсій. Адначасова тысячы дзяцей апынуліся ў новай адукацыйнай і культурнай рэальнасці, дзе беларуская мова, гісторыя і культурніцкі кантэкст аказаліся па-за межамі школьнай праграмы.
Выклік праекта — захаваць бесперапыннасць ведаў і культурнага досведу, не дапусціўшы страты мовы, сувязі з традыцыяй і разумення ўласнай ідэнтычнасці.
Мэты і задачы
Праект ставіць за мэту:
- замацаванне беларускай нацыянальнай ідэнтычнасці дзяцей у эміграцыі;
- падтрымку рэпрэсаваных настаўнікаў і захаванне іх прафесійнай дзейнасці;
- стварэнне ўстойлівай адукацыйнай супольнасці вакол беларускай культуры.
Для дасягнення гэтых мэтаў прадугледжана:
- рэгулярнае навучанне прадметам беларускага кампанента;
- уключэнне культурных і творчыx практык у адукацыйны працэс;
- фармаванне асяроддзя, у якім беларуская культура існуе як жывая практыка.
Што ўключае праект
Заняткі для дзяцей ахопліваюць:
- беларускую мову і літаратуру;
- гісторыю і культуру Беларусі;
- традыцыйныя песні, танцы і гульні;
- мастацкія і дэкаратыўна-прыкладныя заняткі;
- батлейку і тэатральныя формы;
- удзел у каляндарных і традыцыйных святах.
Заняткі праходзяць па суботах і доўжацца да 5 гадзін, спалучаючы навучанне, творчасць і супольны досвед.
Геаграфія і маштаб
Лакацыі: Варшава і Гданьск
Колькасць настаўнікаў: 7
Колькасць вучняў: каля 60
Перыяд рэалізацыі: лістапад 2025 — травень 2026
Пра выканаўцу
Беларуская школа ў Варшаве (БШВ) — адна з найбуйнейшых адукацыйных ініцыятыў беларусаў у эміграцыі.
Школа пачала працу ў 2022 годзе як анлайн- і афлайн-прастора для дзяцей, якія апынуліся ў Польшчы і іншых краінах пасля гуманітарнага крызісу ў Беларусі. У 2023 годзе ў БШВ навучалася больш за 500 дзяцей, а аддзяленні дзейнічалі ў розных гарадах Еўропы і за яе межамі. З цягам часу многія аддзяленні школы сталі самастойнымі адукацыйнымі ініцыятывамі, але БШВ працягвае выконваць ключавую ролю ў фармаванні міжнароднай беларускай адукацыйнай супольнасці.
Праект падтрыманы праграмай ArtPower Belarus у межах Трэка 3. Праекты ў асаблівых абставінах і фінансуецца Еўрапейскім Саюзам.
